Земляконьке, конат путсть оцю вий газетать касоманцты
Васенцекс, кие кармась серматкшнема газетав корреспонденцият тя Р.Р. Федькин (1913-1997 к.к.), шачема коряс Клопинка велеста.
Васенце стихотворенияц «Шинясь пееди сенем менельса», тяфтама мазы лемса печатлафоль 1926-це кизоня «Од веле» газетаса.
Меле лисендсть сонь лия стихонза «Гаврянь Васюнясь» (1926к.), «Сексесь», «Постуфть мороц» и лиятне. Пцтай марнек литературнай произведениянза лисендсть мокшень газетать страницава.И.М. Кшнякин, шачсь Атерь велеса (1913-1997 к.к.). 1939-це кизоня совпартшколань аделамда меле сон путфоль работама «Мокшень правда» газетав редакторкс. Газетаса работаманц пингста лама тись мокшень журналистонь анокламань тевса. Ся пинкнень сонь мархтонза ряцок работасть минь районцтонк лисьф журналистне Ф.С. Руськин, А.П. Майоров. И.М. Кшнякин редакторкс покодсь 1941-це кизонь март ковть самс.Ф.С. Руськин (1905-1975 к.к.) шачсь и кассь Кяшал велеса. Ушедсь покодема мокшень газетаса 1930-це кизотнень ушетксста. Ульсь собственнай корреспондентокс, переводчикокс, отделонь заведующайкс. 1952-це кизоня путфоль редакторкс. Эряфонц эзда 30-да лама кизоть максозе мокшень журналистикати.А.П. Майоров (1903-1970) тоже шачсь и кассь Кяшал велеса. «Мокшень правда» газетав сась работама 1939-це кизоня. Ульсь войнаса. Войнада меле 1946-це кизоста сявомок и пенсияс тумозонза работась газетаса разнай отделонь заведующайкс и редакторти заместителькс.
Содаф мокшень поэтсь А.С. Малькин (1923-1976) эсь трудовой кинц ушедозе тоже «Мокшень правда» газетаса. Васенцеда покодсь младшай корректоркс, а тоса етафтфоль литературнай сотрудниконь работас. Газетать страницаса печатлавкшнесть сонь лама стихонза, очерконза и азксонза.
Газетаса, тяфта жа, 60-це кизотнень еткова работакшнесть минь земляконьке М.М. Ковнин, В.Н. Равочкин.
И.А. Шукшин «Мокшень правдав» сась университеть аделамда меле и сявфоль литературнай сотрудникокс. Работась тяса 2006 кизоть самс. Тяшнесь материалхт разнай кизефксонь колга. Сафнезе смузенц и литературнай тевсонга. Тяшнесь стихт, азкст.В.И. Брындинась, васенцесь райононь аватнень еткста кие работась «Мокшень правда» газетаса. Сон шачсь Пичепулоня велеса, учителень семьяса. Аделась Мордовскяй университетть журналистонь отделениянц. Сон серматкшнесь интереснай материалхт разнай тема лангс, стихт, азкст. Лиссь стихонь и азксонь сборникоц. Сявомок 2008-це кизоть эзда и тячемс работай редакторкс «Якстерь тяштеня» журналса.
Комозьда кизода лама работай собственнай корреспондентокс И.П. Вешкин, минь велеэряйнеке. Атюрьевскяй районцта рабоче-сельскяй корреспондентокс лезнесть «Мокшень правда» газетати М.П. Кшнякин (1917-1980 к.к.), М.В. Кондрашкин (1926-2002 к.к.). Кафцьке синь Мордовиянь школань заслуженнай учительхть.
Эсь азкснон, очеркснон, стихснон кучсезь и печатлакшнезь газетать страницаса поэттне В.А. Волков, П.К. Торопкин, Ф.М. Костяйкин, сембе синь шачемас коря Атюрьевскяй райононь.
Тя строчкатнень сермадысна лувондови газетать внештатнай корреспондентокс. Тядде топодсь 45 киза, кода мон серматфнеса «Мокшень правда» газетать и моньцке кучсян газетав разнай материалхт и заметкат. Лисенди, што монга путнян путкскат мокшень печатть развитиянцты.
Василий Сиркин, краевед.