Нюрьхкяня азкст
Баняв эжема
Тялось ся кизоня кельмоль и ловуволь. Марнек февраль ковть пяляскодкшнесь вармась, нефтсь-крхтась файсь. Фкя ёткшиня арьсесь Попкянь Настась уштомс баня. «Ювадьсайне шабра ялганень баняв, чайняда сиптяма, али сяда кяжиняда, и корхнетяма. Мзяра пинге ни ашеме васедчне?»
Азф-тиф. Ювадезень сембе баба ялганзон: и маластотнень, и ичкоздетнень. А Мишаресь, Анна баба, эрясь вчёк Наста бабань перенц песа. Бта аф ичкозе, а переса ловонь фальхне кафта ломанень сересот. Сяс Анна бабанди тиема килькш ульцять квалмова, штоба пачкодемс Настань шири.
Маластонь бабатне ни штасть-нардасть баняса и копорясть чайда Настань ширеса. А Мишаресь коданга аф пачкоди.
-Ну, бабанят, тинь копоряда, а мон Аннань самс молян сявазень андан-урядан, - срхкась ушу Наста. А сявац ульсь оцю, равжа, кувака сюра.
Сувамок калдазу няезе - мес-бди сявать калфтсы.
-Вай, стирнязе-матанязе, эйндать? Щас эжжьте! Мишаресь нинге мзярда сай, а тон снярс эжат, - и сувафтозе сявать баняв, а сонць куцсь лата пряв сявати тишенкса.
А тя пингть Анна баба ни пувордась Настань кенкшенц шири. «Пасиба Шкайти, пачкодень! Афи суван ни куду, туян видеста баняв», - и срхкась. А баняв урядаф кинясь ётай вчёк вальмянять ваксска. «Васенда ванома, кие баняса», - арьсесь Анна. И… ванкстсь вальмя клянцеконять пачк. А тоста ванць Анна бабань лангс равжа, сакалу шама, сюронза, сяконь ватт, ушу лисихть, сельмонза сенем толдыкшекс палыхть…
Анна бабань сельмонза лисекшнесть лангс. Коста сявовсь сяшка вайгяльсь. Ювадеманцты Наста баба эводемска ашезь кенере, кевадазе лата пряста ведарканзон-шаванзон лангс. Анна бабань тя калдорфти шяярензовок мянь стясть. «Сембот, сивомазь! Сембе ширде сайхть!- арьсесь Мишаресь. – Но сяка пря аф кадан!» И мезе ули виец кфчядсь перень кенкшкять шири…
Наста баба шамордозь лиссь калдазста и мезе няи: перень кенкшкац ширем, фкя петляса кирди, омбоцети сязьф нардама пе повфтаф. «Тя кодама-шта, давол-лишме ётась дворозень пачк?» – ушедсь мяштезонза крёзонь путнема Наста баба.
Нежедсь перень кенкшкять шири и ванкстсь пери. Перева мярьгат ракета ётась. Коса ловда аф пяк ламоль – тифоль кели ян, мяк модась штадоль, сери фальхнень пачк варятольхть, конатнень пачк лац няевсь Мишань Аннать кудняц…
«Вай-аш! Вай-аш!»
Кода-бди васьфтине Кураень Маряка-бабань, кона мезе-бди кагодс ашкотф кандоль ульцять туркс. Пшкядень:
-Шумбрат, Марякай!
Сон лоткась, шарфтозе прянц и ушедсть кяденц алга ванондомон:
-Тонцьке тазаня ульхть, идняй! Аф шарьхкодте аньцек, киннят?
-Цяканонь Лидать оцювоцан, Пётороц!
-Вай, церсна-небесна улеза вастоняц тядяцень, пара вайме ломанель, ашель саразонди валняц, да рана киге прдазе Шкайсь эземозонза.
-А тон, Марякай, нинге од стирькс ласькондят, коза тяфта эряскодат?
-Эх, идняй, грех пеетькшнемс сиренятнень, ванолине кода тон вейхсоньгемонь кизоса ласькондят.
-Тят кяжия, Марякай, мон вдь паронь арьсезь, аф пеедезь.
-Да, пасиба Шкабавазти – Оцю Кормилецти, пильгоне нинге якайхть, да нинге сяваненди, кда аф синь, кунара ни улелень калмоса. Лофцонязе ули, вага аф лама вайня пихтень, - и Маря баба няфтезе кагодс ашкотф вай пакшонц.
-И коза тяфта кандсак, Марякай!
-Да сафт Салма бабань уноконза. Няк кудсь бабать куломда меле шава, сяс тяни уноконза тоза кодама-бди фазенда оснавасть. Шинек-венек тетьксосазь велеть келес морамаснон. А тячи шиньберьф, кульсак: «Вай-аш! Вай-аш!» Ужяленди арасть шабанте, улема вачедот, вай анайхть.
И виде, ульцянь келес тетьксезе «Вояж» мороть музыкальнай центрасна, нльне колонканза юпиесть.
Петр Шумкин.