Лемсна содафт масторть келес
Фалу Мордовиять эряфсонза ульсть оцю и ёмла событият, сталмот и сяськомат. Но мокшэрзянь масторса эряйхне эреклафнезь и мазопнезь шачема модаснон, ламолгофнезь козяшиснон. Синь лемсна содафт масторть келес: Ф.Ушаковонь, С.Эрьзянь, В.Н. Дежуровонь, Н.Т. Антошкинонь, М.П. Девятаевонь и лиятнень.
Мокшэрзянь мастороньке, модать лангса аньцяй вастонясь, арась ламонди приметавикс, мзярда сонь валдоптозе великай скульпторть С.Д.Нефедовонь тяштец. Пяк ёмла уженясь арась содафокс, сяс мес сон казсь мирти оцю Мастер. Тяштсь, конань крьвястезе афкуксонь творецонь кядьсонза, аф олси тянивок, веконь ётазь. Степан Эрьзянди сюконяй народсь, кинь лемонц тиезе кайгикс, сявомок сонь эстейнза омбоце лемонди.
Эрьзя - тяфтама псевдоним эстейнза кочкась, сембе мирти содаф скульпторсь, С.Д. Эрьзя. И шарьхкодеви мес - вдь «эрзя» мярьгихть мордовскяй народть фкя этническяй группанцты, кона эряй Сура и Алатырь ляйхнень маласа. Тяса, Ардатовскяй райононь Баева велеса шачсь С.Д. Нефёдов (Эрьзя). Сон ётась стака и тяка пингть интереснай эряфонь ки. Стака, интереснай и аф фкя лацонне творчествацка. Ламоц работанзон эса няфтевихть авторть эряфонь мяленза, ся средась, конань эзда сон лиссь, маластонь ломанензон образсна. Пяк цебярьхть скульпторть тядянц и алянц портретсна, «Эрзянка», «Мужик», «Бурлак» шуфтста тиф скульптуранза.
Художникть творчестваса оцю васта занцихть революцияти лемтьф произведениянза. Вии изобразительнай средстваса мастерсь няфнесыне эстонь трагическяй событиятнень, революционерхнень - народнай павазть инкса тюремаснон.
Художникть кельгома темац - авань обрасне. Тейст прототипокс арасть лама странань и национальностень аватне, конатнень сашендовсть няендемс эсь шачема ширестонза и лия масторста. Тянь колга азондыхть сонь скульптуранза «Эрзянка», «Рузавань портрет», «Норвежскяй ава», «Ассиргитка» и стак тов.
С.Д. Эрьзя колмогемоньда лама киза эрясь омба масторса. Но коса афоль уле - Италияса ли, Францияса или Аргентинаса, сон мзярдовок ашезе юксне эсь Родинанц. Океанть тона бокстонь шуфттнень эзда сонь инголенза фалу стяшендсть шачема ширень кельгома обраст, конат сотфт талантливай народонц поэтическяй фантазиянц мархта.
Художникть работанза, конат лемтьфт Родинань, маластонь ломанень, идькс пингонь обрасненди, сяда крхкат, верондафтыхть, мяляфтовихть, и, конешна, кельговихть эстейнза авторти. И аф ли тя кельгомась, шачема ширети лажадомась кошардозь мастерть сиредембяльхть кадомс ичкоздень масторть.
С.Д. Эрьзянь мекольдень персональнай выставкац ульсь Москуса 1954 кизоня. Оцю впечатления, оцю дивандама васта, великай скульпторсь тись москвичненди и столицань инжихненди. Тянкса сонь казезь Трудовой Якстерь Знамянь орденца.
С.Д.Эрьзя кулось 1959 кизоня, ноябрьста. Калмаф Саранскяйса. Лемозонза панчф Саранск ошса музей, коса ванфтовихть сонь скульптуранза. Синь ваномост сашендыхть аф аньцек Россияста, но и марнек масторть лангста.
Мокшэрзянь масторса тяниень пингтьке, аф кржа машты кядь ломаньда, конатнень лемсна лац содафт ламоц ошева-регионга. Тавлань шуфтонь налхкшкятне, Теризморгань мокшэрзянь национальнай щапне, Кочкуровань эсь кодаф цюлкатне-варягатне примасть участия аф фкя выставкаса.
Мокшень церать, Петр Добаевонь, лемоц лац содаф марнек Россияса. Од скульпторсь шачемань коряс Атюрьевскяй райононь Кяшал велень. Емла пингстонза, тядянзон-алянзон мархта, шачема ширестонза тусь эряма Сергиев Посад ошу . 2002-це кизоня, Саранскяйса, ульсь сонь васенце персональнай выставкац, кона пяк тусь тястонь эряйхнень мяльс. Тяда меле Добаев аделазе Москувонь С.Г.Строгановонь лемса художественно-промышленнай университетть. Цёрать скульптуранза, конат тифт шуфтста, кевста и бронзаста, кунара ни лихневихть Всероссийскяй выставкас. Аф кунара Пётр тага сашендсь Мордовияв. С.Д.Эрьзянь лемса музеень выстовочнай залса, коса панчфоль скульптурань Всероссийскяй выставка, кафта кельгома работанза - бронзаста тиф мокшень и эрзянь щамса аватне - занясть няевикс васта. Синь тифт мокшэрзянь искусствань койхнень- обуцятнень коряс. Пётр Добаев тяни эряй Москуса, но мокшэрзянь масторсь, тястонь перьфпяльсь, кода азозе сонць, максси теенза эсь лацонь од вийхть и эрьгя. Цёрать кемот сотксонза республикань ламоц скульпторхнень и художникнень мархта. Сон лувондсы прянц афкуксонь мокшекс, сяс ётксост прянцка марясы сяда павазуста.
Мон арьсян: тя од талантливай мокшень цёрась, кода и эсь пингстонза эрзянь цёрась, С.Д.Эрьзя, канды оцю слава мокшэрзянь шачема краезонк. Марян гордость мокшэрзянь масторозень инкса. Тяста лиссть афкуксонь патриотт, конат кельгсазь эсь Родинаснон, шачема - касома кяльснон. Вдь шачема ширьда, кельгома ломаньда, тядяда - аляда, ялгада, эсь кяльдот, эсь народцень койдонза - обуцядонза питни мезевок аш. Коса ба афолеме уле, седиеньке тердьсамазь тя ширети, ару лятфнематне аф максыхть тейнек юкстамс минь юроньконь - коеньконь.
Катк эрь народсь ванфтсы сянь, мезсь тейнза кунара ульсь маладонга-малакс, питнидонга-питникс.
Анна Казейкина, Перевесье велень школань тонафнись.