Кафта пингонь эряф
Атясь бабанц мархта эрясть:
Осалста или парста,
Сембот няфтсь синьдеест эряфсь
Векснон етафтсть марса.
Кафцьке ульсть удалафт одста,
Велень шнама васттольхть.
Парста няфтсть пря ломань еткса
Андя мархта Наста.
Киньдинге ашель осал валсна
Ульсть синь валда ваймот.
Инжихть васьфнесть кшиса-салса,
Пароньфнесть тя аймакть.
Эстонь эряфсь хоть и стакаль,
Ванозь сире койхнень.
Праздник шиста инжикс якальхть
Ашесть вайксне-ойксне.
Весяласта раднят-плямат
Пирхнень етафтсть марса.
Пиравама туйхть, щакшнесть кямот,
Стак шить якасть карьса.
Покодемстонга исть нолгад-
Тевсна кядьсост лакась.
Осал вал исть корхне колгаст,
Тевфтома исть яка.
Идьсновок синь тяфта тонафтфт-
Касфтозь тевонь кельгикс.
Сянкса шнакшнесть эсост ломать
Аф паневат мельгаст.
Кассть и тушендсть, синьцень кисна,
Кажнайть соньцень вастоц.
Еню ломанькс лихтезь идьснон
Андя мархта Настац.
Кудсна синьфтемост лядсь шава.
Тяфта эряфсь етни.
Ужяль сянкса, мес лиява
Эряма срадсть оттне,
Эряфонь аф теждяль кисна,
Конанц марса етазь.
Пичефкссь фкя, кда эряльхть идьсна
Стака киста аф потазь.
Штоба сире койхнень ванольхть,
Кие сай - лац васьфтемс
Мезе ули, макст, кда анайхть,
Ломань кяшт аф сафтомс.
Тяни няйсасть пинкне кодапт:
Ломатть мокшет, тякот,
Шабрань куд потмоть аф содайхть,
Юргома аф якайхть.
Инжихть учсесть сиренятне:
Покру, поза, пачат,
Штатолсь, палсь шкайуженяса
Сире койхнень лаца.
Ули мезьда симдемс-андомс,
Аф ингольцекс – капстат.
Ськамонза озаф шра вакс Андя -
Каршесонза Настац.
Пади тячиень шить инкса
Копордайхть аф ламнянь,
Лятфтайхть кода ульсь од пингста
Атят-бабат ськамняст.
Василий Ерцкин.