Мокшень Твардовскяй
Аш аф кода лятьфтамс сявок, што тя поэмась тусь мялезонза эстонь СССР-нь Писателень Союзонь члетнонди. Тянь колга лятьфнесы И.М. Девин. 1951-це кизоня май ковста СССР-нь Писателень Союзть видеса етафтфоль совещания, коса ванондовсть мокшэрзянь литературать сатфксонза. Тя совещанияв терьфольхть Мордовияста писателень группа. Синь етксост ульсть И. Девин и А. Малькин. Совещаниясь мольсь кафта шит. Омбоце шиня максфоль вал А. Малькинондинге. Эста СССР-нь Писателень Союзть правлениянцты председателькс ульсь Н.С. Тихонов. Сон эста содафтозень совещанияса ащихнень А. Малькинонь лемонц и творчестванц мархта. А. Малькин рузонь кяльса лувозе «Поэма о бессмертии» произведениянц. Вов кода лятьфни тянь колга И.М. Девин.
«…Н. Тихонов люкафтозе прянц, мзярда Саша аделазе поэманц лувоманц. Сяльде мярьгсь штоба лувомс аф оцю пакшкя мокшекс. Аф мяляфтса кодама пакш лувсь, но няевсь, што стихонь ритмикась тусь москвичнень мяльс. Малькин сонцьке тусь ломатнень мяльс, маряк вайгяленц корхтаманц, прянь кирдеманц инкса. Да нинге улема сянкса, мес няевсь шабакс, а мяштьсонза орден ни…»
Основной доклад тя совещанияса А. Малькинонь творчестванц колга тись рузонь поэтсь Я. Френкель. Сон лама пара вал азсь эста мокшень поэтть колга. Стане жа и лия рузонь поэттне, шназь А. Малькинонь творчестванц. А вов М. Горькаень лемса литературнай институтонь студентсь С. Платонов корхтаманц эста аделазе тяфтама валса:
«А. Малькин- тя мокшень Твардовскяй».
Вов кодама пара лятьфнемат кадсь И.М. Девин эсь поэт ялганц колга, конат печатлафтольхть «Мокша» журналть 1999-це кизонь 7-це номерсонза «Шкабаваз, тяст юкстав ялгане» лем ала.
А. Малькинонь васенце поэмац «Поэма аф куломать колга» арась хрестоматийнайкс. Вов ни пцтай 60 киза лисенди школьнай учебникнень эса. Сонь коряванза серматфт ни сядот сочинения и дипломнай работат. Аф фкя поколениянь од ломанень седис кадсь и кадонды оцю патриотическяй мяльхть.
Василий Сиркин, краевед.