Мокшэрзятнень лия нароттнень мархта эрямасна
Тячиень мокшень кяльса улихть валхт конат сявфт кунардонь уральскяй племать кяльста. Ванцаськ: мокшекс лем, эрзякс лем, финскяйса ними, марийскяйса лем, удмуртскяйса, комиса ним, самодийскяйса ньум; мокшекс кяль, эрьзякс кель, марийскяйса кыл, удмуртскяйса кыл, самодийскяйса се; мокшекс пиза, эрзякс пизэ, эстонскяйса леса, венгерскяйса фезек, самодийскяйса пиде и лият.
Уральскяй племать кафтова явомдонза меле финно-угорскяй племась етась эряма европейскяй пяльти и занясь аймак Волга ляйста сявомок Балтийскяй моряти молемс. Финно-угратне ульсть охотникт, эрьсесть фкя вастса. Ся пингонь атянь-атяньке кирнесть жуватат (финно-угорскяй кяльге содафт траксть, вазть лемсна). Финно-угорскяй племаста мокшетнень кяльс сась нинге сяда лама марстонь вал. Мокшекс пине, эрзякс пине, финскяйса, эстонскяйса пени, марийскяйса пи, удмурскяйса пуны, венгерскяйса фене; мокшекс вер, эрзякс верь, финскяйса, эстонкяйса вери, удмуртскяйса, комиса вир, венгерскяйса веер и лият.
Финно-угорскяй племась ниле тежянь кизода инголе тага явсь кафтова: угорскяй и финно-пермскяй племава, кафта кяльге явсь и финно-угратнень кяльсна. Угорскяй племаста сяда меле появасть венгратне, ханты и манси плематне. Финно-пермскяй марсторонь племась - прибалтийскяй фиттне, коми, удмурттне, мариецне и мокшэрзятнень атянь-атясна. Эрсесь тя племась Окать и Камать еткса. Ся пингонь кяльста мокшеннети састь сура, люкшя, сиволь, мешке, мешкс и лия лама валхне. Финно-пермскяй пингонь атянь-атяньке кармасть ни сокама-витцема мода. Финно-пермскяй племясь явсь кафту: пермскяй и финно-волжскяй.
Финно-волжскяй племась - тя прибалтийскяй фиттнень, мариецнень и мокшэрзятнень атянь атясна. Эрясь тя племась тяниень Россиять кучка пялькссонза. Аньцек аф пяк ламос: кафта тежянь кизода инголе сон тага явсь кафту: шачсь волжскяй племась (мариецнень и мокшэрзятнень марстонь племясна) и прибалтийскяй пляматне: фиттне, эстонецне, карелхне, ижорхне и лиятне. Ученайхнень еткса аш фкя мяль: ульсь ли мокшэрзятнень и мариецнень фкя марстонь племясна. Аньцек, кда лацкас ваномс мокшень, эрзянь и марийскяй кяльхнень, можна мумс стама фкаксшит, конат улихть аньцек азф кяльса: мокшэрзянь и марийскяй.
Волжскяй племась минь эраньконь ушетсонцты тага явсь кафту: эвондась мариец-нень атянь-атясна и мокшэрзятнень атянь-атясна.
Коса эрсесть мокшэрзятнень атянь атясна? Лямбе шире синь эряма вастсна пачкотькшнесь ся вастти, коса степне васетькшнихть вирть мархта, коза пачкотькшнесть иранскяй племятне.
А атянь-атяньке ульсть сотнефт иранецнень мархта, сяс мес тячиень мокшень и эрзянь кяльса лама иранскяй кяльста сявф валда (кшни, узер, азор, седь, ваз и лиятне). Кельме шире атянь-атяньконь эряма вастсна пачкотькшнесь тяниень Нижняй Новгородть малас. Тя вастова (тячи тяса эряйхть руст) васьфневихть велень, ошень, ляень лепт, конат тиевамань коряс мокшэрзяннет, кепотьксонди: Арзамас - эрзянь мастор, Чуварлей - чувар (шувар) лей (ляй) и лият. Шинь стяма ширеса атянь-атяньконь эряма вастсна пачкотькшнесь Волга ляйть трвас. Равть бокса эряй мокшэрзятне састь тяза Пензенскяй областьста, Мордовияста. Шинь валгома ширеса мокшетнень и эрзятнень марстонь племаснон эряма вастсна пачкотькшнесь Рязанскяй области. Тячи тяса велень-ляень лемда, конат тиевомань коряс мокшэрзяннет аф пяк лама (лашма, кадом, нарма), аньцек археолокне мушендыхть лама мокшэрзянь кунардонь калма.
Мокшэрзятнень марстонь племясна эрясь аф ськамонза, башка, а ульсь сотнеф лия кяльса корхтай шабрань нароттнень мархта. Атянь-атяньке сотнефтольхть иранскяй плематнень (скифнень, сарматнень, алатнень) мархта, ся вастса, коса степсь васетькшни вирть мархта. Атянь-атяньконди шабракс ульсть тюркскяй плематне. Сотксне ушедсть нинге IV-це векста, мзярда Донской степненди эвондасть гуттне (гуттне - тюрскяй кяльса корхтай племя). Сирет и кемот сотксне ульсть кунардонь мордвать и татархнень еткса. Тячиень мокшень кяльса кафта сядода лама татаронь вал (алаша, айгор, курка, нокта, башка, такор, конак, каман, ару, туган, таз, сакал, поза и лиятне).
Прикаспияса VII-це - VIII-це векста державась кочказень кядалонза Поволжьяса эряйхнень модаснон. Ули кода арсемс, што хазархнень мархта кунардонь мордвась торгавакшнесь. Поволжьяса VIII-це векста появасть булгархне (булгархне - тюрскяй кяльса корхтай племя), конат Волгать перьф кеподсть вии государства - Волжскяй Булгария. Кунардонь мокшэрзятненди булгархне ульсть аф аньцек шабракс, тя государствав сувсесть кунардонь мордвать моданзон пяльксонза.
Кельме шире атянь-атяньке ульсть сотнефт меря племать мархта. Тя финно-угорскяй племать колга VI-це векста сермадсь готскяй историксь Иордан. IX векста племать лемоц васьфневсь рузонь летописева, XI векста мерять колга ашесть корхне ни, тя племясь валом-валом шорявсь теньгушевскяй эрзятнень корхтафксса.
Пяк кунара и пяк кемоста атянь-атяньке ульсть сотнефт славяттнень, сяда меле руснень мархта. Тячи стака корхтамс мезе макссь славяттнень кяльсна мокшень и эрзянь кяльхненди. Аньцек содаф: мокшень и эрзянь кяльхненди руз валсь сувась древнерусскяй кяльста.
Кода арьсихть археолокне, мокшетнень и эрзятнень племясна эрясь V-це и VI-це векста. Мес тяфта лиссь? Академиксь Б.А. Серебренников арьси: мокшетнень и эрзятнень марстонь племяснон кафту явозе лямбе ширеста саф тюрькскяй кяльса корхтай кодама бди племя Историяса содаф факттне кемокснесазь Б.А. Серебренниковонь арьсеманзон: содаф, што восточно-славянскяй плематнень эзда эвондаль ба фкя народ, аньцек татархне шорясть тя тевти и эвондасть колма наротт - русне, украинецне, белоруссне. Сембе азф туфталхнень сюнеда атянь-атяньконь марстонь племясна валом-валом кармась явома кафта пяльксова: мокшева и эрзява, а синь кяльсна мокшеннева и эрзяннева. Аш кода корхтамс, што атянь-атяньконь марстонь кяльсна эстокиге явсь кафта кяльге. Тевсь, арьсетяма, ульсь тяфта. Васенда марстонь кяльсь явсь кафта диалектова. Сяльде фкя кялень кафта диалекттне валом-валом кармасть срадома фкя-фкянь эзда, кармась полафтовома синь вайгяльксонь лувкссна.
И аф стак мордвать письменностец кармась тиевома кафта кяльса. Тячи республикасонк кафта кяльса печатлакшневи художественнай литературась, кафта кяльса лисендихть журналхт, газетат, мокшень и эрзянь кяльхне тонафневихть вузса, школаса, кафта кяльса корхтайхть телевизорса.
Татьяна Шукшина.